-

1. Многолетье Ивану IV

Ако подобает на часех на царских многолетствовати многолетна.

Устрой, боже, благовернаго и христолюбиваго царя и государя, великаго князя Ивана Васильевичи на многа лета. Многалетна. Устрой, боже, благоверьнаго и христолюбиваго царя и государя, великого князя Ивана Васильевичя всея Руси на многа лета. Многалетна.

Устрой, боже, благовернаго и благороднаго и христолюбиваго царя, богом избраннаго и богом почтеннаго и богом возлюбленнаго, богом венчаннаго и богом соблюдаема и богом превознесеннаго, государя нашего, великого князя Ивана Васильевича Владимеръскаго и Московъскаго, и Смоленъскаго, и Тверъскаго, и Новгороцкаго, и Пъсковьскаго, и Болгаръскаго, и Язтараканскаго [и] иныя всея Руския земли самодеръжца. Государю нашему на многа лета. Многалетна.

Устрой, боже, благовернаго царевичя Феодора Ивановичи, устрой, боже, благовернаго царевичя Дмитрея Ивановичя на многа лета.

Благовернаго великаго князя Семиона Бекбулатовичя Тверьскаго на многа лета. Многалетна.

Устрой, боже, господина нашего пресвещеннаго архиепископа Александра новгороцкаго и пьсковьскаго на многа лета. Многалетна.

Устрой, боже, православное христолюбивое царя и государя, великаго князя Ивана Василь[евича] воинъство,благоверных и христолюбивыхь князи руских и боляр, пекущихся о божиихь церквах и о всемь православном християнстве на многа лета. Многолетна.

Устрой, боже, все православное христьянство и даруй [и]мь всякого блага.

О, владыко, Христе царю, спаси и помилуй и избави нас от нашествия иноплеменных и междособныя брани, и от напрасный смерти защити, спаси и помилуй на многа лета. Многалетна.

Устрой, боже, все православное христьянство в мире глубоце и во благовременней помощи и во умножении плодовь земных на многа лета.

Спаси, Христе боже, всих преподобных отець наших, игуменов и архимандритов, еже о Христе з братьею, и весь чин священнический, и отець наших духовных, и святым храмом сим в веки веком. Аминь. (лл. 153об -154 об.)

2. Заздравная Ивану IV

Молитва заздравия. Говорить над кануном: «Благословен бог нашъ» Таже: «Никто же притекая ко тебе». Таже тропори и по трепарех: «Господу помолимся». Та же канун пети и крестить трижды, та же молитва.

Владыко многомилостиве, господе Исусе Христе боже нашь, молитвами пречистыя владычица нашея богородица и присно девы Мариа, силою честнаго и животворящаго креста, заступлением честных небесных сил безплотных, честнаго и славнаго пророка и предтеча крестителя Иоанна, святых славных и всехвальных апостол и святых добропобедных мученик, преподобных и богоносных отець наших, святых праведных богаотець Иааокима и Анны и святых трех святителей, вселеньскых учителей, Василья Великаго и Григорья Богаслова, Иоанна Златоустаго, и иже в святых отца нашего Николы архиепископа Мирликийскаго, чюдотворца, иже во святых отець наших архиепископов александрейскых, чюдотворцов, Афонасиа и Кирила, иже во святых отца нашего Петра митрополита всея [520] Руси, чюдотворца, иже в святых отца нашего Леоньтеа, епископа Ростовьскаго, чюдотворца, и святых и великых мученик Егорьгиа, Дмитрея и Феодора, и преподобных и богоносных отець наших Антоньа и Феодосиа Печерскых чюдотворцов, и преподобных и богоносных отець наших Сергее и Варлаама и Кирила Белоозерьскых чюдотворцов, иже во святых отца нашего Кирила архиепископа Иерусалимьскаго, чюдотворца, преподобнаго и богоноснаго отца нашего Дмитреа, Вологадцкаго чюдотворца, и святых страстотерпець Бориса и Глеба, и преподобнаго отца нашего Сергеа Радонежскаго, чюдотворца, и святыя великомученицы Парасковеи, нареченныя Пятницы, и святаго его, есть день, и тех всех святых молитвами спаси, господи, и помилуй благовернаго и христолюбиваго царя и великаго князя Иоанна Васильевича всея Руси самодержца Рускыя земли. Даруй ему, господи, душевное спасение и телесное здравие, умножи, господи, лет живота его и покори, господи, под нози его вся видимая и невидимый врагы его, исполни, господи, всю Рускую землю его всякия благодати, огради, господи, силою крестною его, утверди, господи, мышцю его на вся супостаты, ты бо еси источник и податель всякому благу добру приношению. Отцю и сыну, святому духу, ныне и присно, во веки веком. Аминь. (лл. 76об. - 77об.)

3. Стих о нищей братии

Стих воскресения Христова

Христово божие воскресение,
Христово божие вознесение.
Да вознеся Христос на небеса
Со ангелами херувими,
Со апостолами серафими,
Да со всей силой со небесной.
Да нихто на земли не осталсе,
Оставалась одна нищая братия,
Нищая братия, сирота убоги.
Нищая братия слезно плачут,
На господа бога взирают.
«Да не плачте вы, нищая братия,
Не рыдайте убоги сирота,
Да оставлю я вам гору золотую,
Да промежу собой горой поделяйтесь.
Промежу собой горой поровняйтесь».
Говорят ему нищая братия:
«Да нам горою золотою не владети,
На земли будут князья-бояре,
Да отоймут у нас гору золотую».
Тут речет Иоанн Златоустый,
Говорит владыки царю небесному:
«Да оставте им имя христово,
Да станут ходить по селам же,
По селам же ходить да по деревням.
Да станут часто Христа поминати,
На каждой день-час звеличати,
Будут сыты и довольны,
Будут обуты и одены, Да от темной ночиньки укрыты».
Да слава тебе Христу богу, [521]
Да слава тебе сыну божью.
Да кто етот стих послушает,
Тому господь благодать в дом давает. (л.1-3)

4. Стих выговцев об иеромонахе Неофите

Си глаголют пустынножители Неофиту:

Что много грозиши нам,
Что бесишися над христианы?
Ни начальства ти отъяхом,
Ни богатьство Ваше взяхом,
Но буими словесы
Увещати ны помышляеши.
Мы тебе не брежем,
Ни твоихо безумных глагол
И скорби терпим,
Ни имения не щадим
За любовь Христа нашего,
Зане он любит ны
И царства нам дарует.
Тому бо есмы раби
И на него надеемся.
И той нас спасет
От рук враг наших
И дарует рабом своим
Царьство небесное. (л. 237-237об.)

Текст воспроизведен по изданию: Отчет об археографической командировке на Печору 1958 г. // Труды отдела древнерусской литературы, Том 16. М. АН СССР. 1960

Спасибо команде vostlit.info за огромную работу по переводу и редактированию этих исторических документов! Это колоссальный труд волонтёров, включая ручную редактуру распознанных файлов. Источник: vostlit.info