СРЕДНЕВЕКОВЫЕ ИСТОРИЧЕСКИЕ ИСТОЧНИКИ
ВОСТОКА И ЗАПАДА

ПАМЯТЬ И ПОХВАЛА КНЯЗЮ РУССКОМУ ВЛАДИМИРУ

Текст памятника передается в упрощенной орфографии, с заменой вышедших из употребления букв. Жирным шрифтом выделены киноварные заголовки.

Месяца июля в 15 день. Память и похвала князю Рускому Володимиру, како крестися Володимир и дети своя крести и всю землю Рускую от конца и до конца, и како крестися баба Володимерова Олга преже Володимера. Списано Иаковом мнихом.

Паул святыи апостол, церковныи учитель и светило всего мира, посылая к Тимофею писание, глаголаше: «Чядо Тимофею, еже слыша o[т] мене многы послухы, тоже предаи же верным человеком, иже доволне будут и ины научити». И блаженыи апостол Лука еуангелист к Феофилу писаше, глаголя: «Понеже мнози начата повести деяти о известных вещех, бывших в нас, изволися и мне, ходившю исперва и по всех, писати тебе, державныи Феофиле, да разумевши о них же начат Исус творити же и учити». К тому Феофилу написа Деания апостолская и Еуангелие святыи апостол Лука. Потом многих святых писати начата житиа и мучениа. Тако же и аз, худыи мних Иаков, слышав от многих о благовернем князи Володимери всея Рускиа земля, о сыну Святославле, и мало събрав от многыя добродетели его, написах, и о сыну его, реку же святою славную мученика Бориса и Глеба, како просвети благодать Божиа сердце князю Рускому Володимеру, сыну Святославлю, внуку Игореву, и възлюбивыи ¹ человеколюбивыи Бог, хотяи спасти всякого человека и в разум истинныи прити, и вжада святаго крещения. Яко же жадаеть елень на источники водныа, тако вжада благоверныи князь Володимир святаго крещениа, и Бог сътвори хотение его; пишетъ бо: «Волю боящихся его творить и молитву их услышит и спасетъ я»; и сам рече Господь: «Просите и приимете, ищете и обрящете, толчете и отверзется вам, всяк просяи прииметь, ищаи обрящеть, толкущему отверзается»; и паки рече: «Иже веру иметь и крестится, и спасен будетъ, а иже веры не имать, не крестится, уже осужен будетъ». Взиска спасениа и прия о бабе своеи Олзе, како шедши к Царюгороду, и приала бяше святое крещение, и ложи добре пре[д] Богом, всими добрыми делы украсившися и почи с миром о Христе Исусе и в блазе [422] вере. То все слышав князь Володимер о бабе своей Олзе, нареченеи в святем крещении Елена, тоя и жизни подража святыя царица Елены, блаженыа княгини Олги; то слышав князь Володимер, разгарашется Святым Духом сердце его, хотя святаго крещениа. Видя же Бог хотение сердца его, провидя доброту его, и призри с небесе милостью своею и щедротами и в Троици славимыи Бог Отець и Сын и Святыи Дух на князя Володимера, испытал сердца и утробы, Бог праведен, вся преже ведыи, и просвети сердце князю Рускыя земля Володимеру приати святое крещение.

Крести же ся сам князь Володимер, и чада своя, и всь дом свои святым крещением просвети и свободи всяку душю, мужеск пол и женеск, святаго ради крещения. И възрадовася и възвеселися о Бозе Давыдьскы князь же Володимир и акы святыи пророк дивныи Амбакум о Господе веселяся и радуася о Бозе Спасе своем. О блаженое время и день добрыи, исполнен всего блага, в он же крестися Володимер князь! И наречен бысть в святем крещении Василеи, и дар Божии осени его, благодать Святаго Духа освети сердце его, и навыче по заповеди Божии ходити и жити добре о Бозе и веру тверду удержа и неподвижиму. Крести же и всю землю Рускую от конца и до конца, и поганьскыя богы, паче же и бесы, Перуна и Хъроса и ины многы попра, и скруши идолы, и отверже всю безбожную лесть, и церковь созда каменну во имя Пресвятыа Богородица, прибежище и спасение душам верным, и десятину еи вда, тем попы набдети, и сироты, и вдовича, и нищая. И потом всю землю Рускую и грады вся украси святыми церквами, и отвержеся всея диаволя льсти, и приде от тмы диаволя на свет с чады своими, приде к Богу, крещение приим, и всю землю Рускую исторжс из уст дьяволь и к Богу приведе, и к свету истинному. Рече бо Господь пророком: «Изводяи от нечестия нечестиваго, акы уста моа еси». И бысть князь Володимир акы уста Божиа и человеки от лести диаволя к Богу приведе. О колика радость и веселие бысть на земли! Ангели възвеселишася и архангели, и святых дуси взыграшася; сам рече Господь: «Колика радость бываетъ на небесех о единем грешници кающимся». Толика бещисла душь по всеи земли Рускои приведены к Богу святым крещением. Похвалы всякыя дело то достоино створи и радости духовныя полно.

О блаженыи и треблаженыи княже Володимере, благоверне и христолюбиве и страннолюбче, мъзда твоа многа зело пред Богом! То же блаженыи Давыд глаголаше: «Блажен человек, его же ты накажеши, Господи, и от закона твоего научити и, да укротити и от днии лют». Блаженыи князь Володимер, уклонився от службы диаволя, и приде к Христу [423] Богу, Владыце своему, и люди своа приведе и научи я служити Богу; сам бо Господь рече: «Иже створить и научит, се велик наречется в царствии небеснем». А ты, о блаженыи княже Володимере, бысть апостол в князех, всю землю Рускую приведе к Богу святым крещением, и научи люди своя кланятися Богу, славити и пети Отца и Сына и Святаго Духа. И вси людие Рускыя земля познаша Бога тобою, божественыи княже Володимире. Възрадоваша же ся ангельстии чини, агнеце честнии; ныне радуются вернии и воспета и въсхвалиша; акы младенци иевреистии с ветвьми устретоша Христа, вопиюще: «Осана Христу Богу, победителю смерти», тако и новоизбраннии людие Руския земля въсхвалиша Владыку Христа с Отцем и Святым Духом, и к Богу приближившеся крещением и диавола отврьгшеся, и службы его поругашася и поплеваша бесы и познаша Бога истиннаго, творца и съдетеля всеи твари, и поютъ по вся дни живота и на всяк час песнь чюдную, хвалу архангельскую: «Слава в вышних Богу и на земли мир, в человецех благоволение». И ты, блаженыи княже Володимеру, подобно Костянтину великому створи. Яко же он верою великою и любовью Божиею подвихся, утверди всю вселеную любовию и верою, и святым крещением просвети весь мир, и закон Божии по всеи вселенеи заповеда, и раздруши храмы идольскыя с лжеименьными богы, и святыя же церкви по всеи вселенеи постави на хвалу Богу, в Троици славимому, Отцю и Сыну и Святому Духу, и крест обрете, всего мира спасение, с божественою и богомудрою матерью своею святою Оленою и с чады многы, приведе к Богу святым крещением бещисленое множество, и требища бесовьская потреби, и храмы идольскыа раздруши, и церквами украси всю вселеную и грады, и заповеда в церквах памяти святых творити пении и молитвами и празникы празновати на славу и на хвалу Богу: тако же и блаженыи князь Володимир створи с бабои своеи Олгои.

Похвала княгине Олги, како крестися и добре поживе по заповеди Господни.

Та бо блаженая княгине Руская Олга, по смерти мужа своего Игоря, князя Рускаго, освещена бывши Божиею благодатию и в сердци приимши Божию благодать. О како похвалю блаженую княгиню Олгу, братие? Не виде! Телом жена сущи, мужеску мудрость имеющи, просвещена Святым Духом, разумевши Бога истиннаго, творца небу и земли, въставши, иде в землю Гречьскую, в Царьград, идеже цари крестиании и крестьаньство утвердися, и пришедши, проси крещения, и примши святое крещение, възвратися в землю Рускую, в дом свои и к людем своим с радостию великою, [424] освещена духом и телом, несущи знамение честнаго креста. И потом требища бесовьская съкруши и нача жити о Христе Исусе, възлюбивши Бога всим сердцем и всею душею, и поиде въслед Господа Бога, всими добрыми делы осветившися и милостынею украшьшися, нагыя одевающи, жадныя напаяющи, и странныа покоивающи, и нищаа и вдовица и сиротъ вся милующи, и потребу дающи всяку с тихостию и любовью сердца, и молящи Бога день и нощь о спасении своем. И тако поживши и добре славящи Бога в Троици, Отца и Сына и Святаго Духа, почи в блазии вере, сконча житие свое с миром о Христе Исусе Господе нашем. И Бог прослави тело своеа си Олены, еи же имя в святем крещении наречено блаженыя княгини Олгы: и есть в гробе тело еа честное и нераздрушимое пребывае[ть] и до сих днии; Бог бо своя рабы славить, рече бо пророком: «Славящая мя прославлю и укаряаи бещести будетъ». Блаженая бо княгини Олга прослави Бога всими делы своими добрыми, и Бог прослави ю. И ино чюдо слышите о неи: в гробе, идеже лежитъ блаженое и честное тело блаженыа княгине Олгы, гроб камен мал в церкви Святыя Богородица, ту церковь създа блаженыи князь Володимер каменую в честь Святеи Богородици, и есть гроб блаженыа Олгы и на верху гроба оконце сътворено и ту да видели тело блаженыя Олгы лежаще цело; да иже с верою придетъ, отворится оконче и видеть честное тело лежаще цело и дивяся чюду таковому, толико лет в гробе лежащю телу не раздрушимуся. И человеце же вернеи, видевше чюдо толико, славятъ Бога, дивящеся милости Божии, юже имать на святых своих. О дивное и страшное чюдо, братие, и преславно! Достоино и похвалы всякоя тело то честное: в гробе цело, акы спя почивает. Поистине «дивен Бог в святых своих, Бог Израилев». То видя, вернеи человеце прославят Бога, прославляющаго рабы своя. А другим, иже не с верою прихо[дя]ть, не отворится оконче гробное, и не видятъ тела того честнаго, но токмо гроб. Тако Бог прослави рабу свою Олгу, Рускую княгиню, нареченую в святем крещении Елена. По святем же крещении си блаженая княгини Олга живе лет 15 и угодив Богу добрыми делы своими, и успе месяца июля в 11 день в лето 6477-е (969), душу свою честную предавши в руце Владыце Христу Богу. Послушаите, възлюблении.

Блаженыи же князь Володимир, внук Олжин, крестився сам, и чада своя, и всю землю Рускую крести от конца и до конца, храмы идольскыя и требища всюду раскопа и посече, и идолы съкруши, и всю землю Рускую и грады и честными иконами церкви украси, и памяти святых в церквах творяще пением и молитвами, и празноваше светло празникы Господьскыя, три трапезы поставляше: первую митрополиту с [425] епископы и с черноризце и с попы, вторую нищим и убогы[м], третьюю собе и бояром своим и всим мужем своим, подобяся царем святым блаженыи князь Володимир пророку Давыду, царю Езекею, и треблаженому Иосею, и великому Костянтину, иже избраша и изволиша Божии закон боле всего и послужиша Богу всим сердцем и получиша милость Божию и наследиша раи и приаша царство небесное и почиша с всеми святыми, угожьшими Богу. Тако же блаженыи князь Володимир послужив Богу всим сердцем и всею душею. Не дивимся, възлюбленеи, аще чюдес не творить по смерти, мнозе бо святии праведнеи не створиша чюдес, но святи суть. Рече бо негде о том святыи Иоанн Златоусты: «От чего познаем и разумеем свята человека, от чюдес ли, или от дел?». И рече: «От дел познати, а не от чюдес», много бо и влъсви чюдес створиша бесовьскым мечтанием, и бяху святеи апостоли и бяху лжии апостоли; беша святеи пророци и бяху лжии пророци, слугы диаволя; ино чюдо, и сам сотона преображается в ангел светел; но от дел разумели святаго, яко же апостол рече: «Плод духовныи есть любы, терпение, благоверие, благость, кротость и въздержание; на таковых несть закона». Блаженыи же князь Володимер всим сердцем и всею душею Бога возлюби и заповеди его взыска и схрани. И вся страны бояхуся его, и дары приношаху ему. И възвеселися и възрадовася о Бозе и о святем крещении и хваляше и славяше Бога о всем том князь Володимер и сице в радости смирением сердца глаголаше: «Господи Владыко благыи, помянул мя еси и привел мя еси на свет, и познах Тя, всея твари Творца. Слава Ти, Боже всех, Отче Господа Бога нашего Исуса Христа! Слава Ти с Сыном и Святым Духом, сице мя помиловав. Во тме бях, диаволу служаи и бесом, но Ты мя святым крещением просвети; акы зверь бях, многа зла творях в поганьстве и живях, акы скотина, но Ты мя укроти и наказа своею благодатью. Слава Ти, Боже, в Троици славимыи, Отче и Сыне и Святыи Душе, Троице Святая, помилуи мя, настави мя на путь Твои и научи мя творити волю Твою, яко Ты еси Бог мои». Князь же Володимир поревнова святых мужъ делу и житию их и възлюби Аврамово житие и подража страннолюбие его, Иаковлю истину, Моисеову кротость, Давыдово безлобие, Костянтина царя великаго, перваго царя крестианьскаго, того подражая правоверие. Боле же всего бяше милостыню творя князь Володимер; иже немощнеи и стареи не можаху доити княжа двора и потребу взяти, то в двор им посылаше, немощным и старым всяку потребу блаженыи князь Володимир даяше; и не могу сказати многыя его милостыня: не токмо в дому своем милостыню творяше, но и по всему граду, не в [426] Киеви едином, но и по всей земли Рускои и в градех, и в селех, везде милостыню творяше, нагыа одевая, алчьныя кормя и жадныа напаяа, странныа покояа милостью, церковникы честя и любя и милуя, подавая требование, нищая, и сироты, и вдовица, и слепыа, и хромыа, и трудоватыа вся милу[я], и одеваа, и накормя, и напаяа. Тако же пребывающу князю Володимеру в добрых делех, благодать Божиа просвещаше сердце его, и рука Господня помагаше ему; и побежаша вся врагы своа, и бояхутся его вси. Идеже идяше, одолеваше: радимице победи и дань на них положи, вятичи победи и дань на них положи на обоих, и ятьвягы взя, и сребреныа болгары победи, и на козары шед, победи а и дань на них положи. Умысли же и на греческии град Корсунь и сице моляшеся князь Володимир Богу: «Господи Боже Владыко всех, сего у тебе прошю: даси ми град, да прииму и да приведу люди крестианы и попы на свою землю, и да научать люди закону крестианьскому». И послуша Бог молитвы его; и прия град Корсунь, и вся съсуды церковныя и иконы и мощи святаго священномученика Климента и иных святых. И в ты дни беаста царя два в Цариграде: Костянтин и Василеи. И посла к ним Володимир, прося у них сестры оженитися, да ся бы болма на крестианькыи закон направил. И даста ему сестру свою и дары многы присласта к нему и мощи святых даста ему; и положь и. Тако добре поживе благоверныи князь Володимир и сконча свое житие в правовернеи вере о Христе Исусе Господемь нашим и с благоверною Олгою; и та бо шедши Царюграду, приала бяше святое крещение и много створив добра в житии семь пред Богом, и сконча житие свое в добреи вере и почи с миром, в руце Божии душю предавши. И еще живу сущю Володимиру князю, рать бяше от печенег; Володимер же бяше болестью одержим, в тои же болезни предастъ душю свою в руце Божии.

Молитва князя Володимера.

Володимир князь, отходя света сего, сице моляшеся, глаголя: «Господи Боже мои, не познал Тебя бях, но помиловал мя еси и святым крещением просветил мя еси, и познах Тя, Боже всех, святыи Творче всея твари, Отче Господа нашего Исуса Христа. Слава Ти [с] Сыном и Святым Духом! Владыко Боже, не помяни моеи злобы, не знал есмь Тебе в поганьстве, ныне же Тя знаю и виде; Господи Боже мои, помилуи мя. Аще мя хощеши казнити и мучити за грехы моя, казни сам мя, Господи, бесом не предаи же мене». И сице глаголя и моляся Богу, преда душю свою с миром ангелом Господним и успе. Праведных бо души в руку Божию суть, и мъзда им от Господа и строение им от Вышняго; того ради [427] приимуть венець красоты от руку Господню. По святем же крещении поживе блаженыи князь Володимир 28 лет. На другое ле[то] по крещении к порогом ходи, на третьее Корсунь город взя, на четвертое лето церковь камену Святыа Богородица заложи, а на пятое лето Переяславль заложи, в девятое лето десятину блаженыи христолюбивый князь Володимир вда церкви Святеи Богородице и от имениа своего. О том бо и сам Господь рече: «Идеже есть скровище ваше, ту и сердце ваше будетъ»; блаженыи князь Володимир имяше скровище свое на небесех, съкрыв милостынею и добрыми своими делы: тамо и сердце его бе в царствии небеснем. И Бог поможе ему, и седе в Киеве, на месте отца своего Святослава и деда своего Игоря. А Святослава князя печенези убиша; а Ярополк седяше в Киеве на месте отца своего Святослава, и Олег идыи с вои, у Вруча града мост ся обломи с вои, и удавиша Олга в гребли, а Ярополка убиша в Киеве мужи Володимерове. И седе в Киеве князь Володимер в осмое лето по смерти отца своего Святослава, месяца июня в 11, в лето 6523 (978). Крести же ся князь Володимир в 10-е лето по убьении брата своего Ярополка. Каашется и плакашется блаженыи князь Володимир всего того, елико створи в поганьстве, не зная Бога. Познав же Бога истиннаго, Творца небесе и земли, покаявся всего, и отвръжеся дьавола и бесов и всея службы его, и послужи Богу добрыми делы своими и милостынею. Успе с миром месяца июля в 15 день, в лето 6523 (1015) о Христе Исусе Господемь на[шимь].

Текст печатается по изданию: Срезневский В. И. Память и похвала князю Владимиру и его Житие по сп. 1494 г. // Записки Имп. Академии наук по ист.-филолог. отделению. T. 1. № 6. СПб., 1897. С. 2-8.

Комментарии

1. Так в рукописи. Следует читать: възлюби и.