I. Лета 90, Юрьево Шестаково посольство к Менли-Гирею царю. А поехал с Москвы марта 15.

Правити посолство Юрью Ивановичю Шестаку от великого князя царю Менли-Гирею, Ази-Гирееву сыну. Князь велики Иван челом бьет. Князь велики послал видети твое здоровье, волного человека. — Князь велики челом бьет: прислал еси ко мне своих послов Турунтая да [29] Халеля и ярлык свой; а в ярлыке писал еси и словом еси ко мне, приказал с своими послы: как еси пожаловал, на чем еси мне свое крепкое слово молвил и ярлыки дал, другу другом быти, а недругу недругом быти, по тому и жалуешь, на том и стоишь, и вперед хочешь жаловати, братство свое и дружбу к нам хочешь высити, о том тобе челом бью. А яз как на чем тобе молвил и правду дал, на том и стою.

А се назавтрее говорити царю наедине. Князь велики велел тобе говорити: говорили ми от тобя твои послы и ярлык ми от тобя подал твой посол Халиль о том, что будто яз к тобе приказал с своим боярином с Тимофеем с Скрябою так, чтобы ты королевых людей и Литвы воевати не велел, доколе к тебе от меня весть будет. А пишет в твоем ярлыке, что еси по моему слову так учинил, не велел еси воевати королевы земли. А нынеча еси прислал ко мне свои ярлыки с своим человеком с Сарыкою, а в ярлыке писал еси, что будто се яз тобе приказал с Тимофеем с Скрябою, чтобы ты с королем помирился. И ты сказываешь, по тому по моему слову с королем помирился. Ино яз к тобе с Тимофеем с Скрябою как того не приказывал, чтобы ты королевы земли воевати не велел, так есми того не приказывал, чтобы ты с королем помирился; а приказал есми к тобе с ним о том, что король ко мне присылал послов своих о любви и о докончание, и яз к нему своих послов послал. А каково дело учнется меж нас делати с королем, ино то будет тобе ведомо. То есми тобе велел сказати. И коли мой боярин Тимофей говорил тобе не по моему наказу, и яз его послал к тобе, и он перед тобою.

А се на третей день говорити царю наедине. Князь велики велел тобе говорити: прислал еси ко мне ярлыки свои с своим человеком с Сарыкою, а писал еси ко мне в ярлыкех о своих делех. Ино как есми тобе на чем молвил и правду дал, на том и стою, и вперед аж даст Бог и до живота хочю на том стояти, другу есми твоему друг, а недругу есми твоему недруг; а добра твоего везде хочю смотрити, сколко ми Бог поможет:— Князь велики велел тобе говорити: приказывал есми к тобе с своим боярином с Тимофеем о том, что король присылал ко мне своих послов о любви и о докончанье, и яз по его слову к нему посылал своих послов; и он нынеча со мною любви и докончания не хочет, а в Орду послал, да подымает на меня моих недругов.— Князь велики велел тобе говорити: и ты бы пожаловал, как еси мне на чем свое крепкое слово молвил и ярлыки дал, что другу моему другом быти, а недругу недругом быти, а на короля именем тобе быти со мною заодин; а будешь с королем и в докончанье, и тобе ему шерть сложити. И ты бы по тому по своему крепкому слову и по [30] ярлыку и жаловал, чтобы еси к королю шерть сложил, а был бы еси на него со мною заодин. А пожаловал бы еси на своем слове стоял, а другу бы еси моему друг был, а недругу бы еси моему недруг был; а яз на чем тобе молвил, на том и стою, другу есми твоему друг, а недругу недруг; а добра твоего везде хочю смотрити.

А учнет царь говорити о том: князь велики ко мне приказал, чтобы яз к королю шерть сложил; а князь велики пак на короля идет ли? — И Юрью говорити так: осподарь мой князь велики нынеча делает свое дело с казанским. А тобе челом бьет, по твоему крепкому слову и по ярлыку, что тобе другу его другом быти, а недругу недругом быти; а на короля именем тобе с ним быти заодин; а будешь с королем и в докончанье, и тобе к королю шерть сложити. Ино король присылал к моему государю своих послов, а хотел с ним любви и докончания. И осподарь мой князь велики, по его слову, к нему посылал своих послов, и он нынеча с моим осподарем любви и докончания не хочет, а в Орду послал подымати на него недругов. И осподарь мой князь велики тобе челом бьет, чтобы еси пожаловал, по своему крепкому слову и по ярлыку, другу его друг был, а недругу недруг был; а на чем еси молвил свое крепкое слово моему осподарю, на том бы еси и стоял; а осподарь мой князь велики на чем тобе молвил, на том и стоит, другу твоему друг, а недругу твоему недруг.

А вспросит царь Юрья о том: о том пак ко мне князь велики с тобою приказал ли, чтобы мне пойти на королеву землю, или людей послати? И Юрью молвити так: то, господине, свое дело ведаешь сам. А государь мой князь велики тобе о том челом бьет, чтобы еси пожаловал, по своему крепкому слову и по ярлыку, к королю шерть сложил, а осподаря моего великого князя другу бы еси другом был, а недругу недругом.

А учнет царь говорити о своем брате о Нурдовлате царе, что к великому князю писал о нем в ярлыце с своим человеком с Сарыкою. И Юрью о том отвечати так: говорил есми тобе от своего осподаря от великого князя речи о том: что еси к моему осподарю к великому князю прислал ярлыки свои с своим человеком с Сарыкою о своих делех, и осподарь мой князь велики дела твоего хочет беречи о всем, а добра твоего везде хочет смотрети, сколко ему Бог поможет. А о брате о твоем о Нурдовлате царе приказывал еси наперед того к моему осподарю и в ярлыке еси в своем писал, чтобы его к тобе отпустил. И осподарь мой, по твоему приказу, отпустил был его к тобе. И как нынеча к моему осподарю пришол ярлык твой с твоим человеком с Сарыкою о твоем брате о Нурдовлате царе, [31] и осподарь мой князь велики, по твоему ярлыку, осадил его у собя, а истому своей земле чинит тобя деля.

А учинится Юрью весть тамо: которой царь будет на Ахматове месте, а покочюет к великого князя земле, ино говорити царю, чтобы пожаловал, по своему крепкому слову и по ярлыку, что ему с великим князем быти заодин на всякого недруга, и он бы пожаловал, на того царя пошол. А будет тамо весть полная, что король пошол на великого князя, и Юрью говорити царю о том, чтобы царь пожаловал, пошол на королеву землю.

Да то памятовати Юрью. Учнет царь посла своего посылати к великому князю, ино говорити о том: как пожаловал царь великого князя братом и другом собе учинил и правду на том дал, по тому бы и жаловал, посла бы своего послал без пошлин.

II. А се говорити князю Азике. Князь велики велел тобе говорити: прислал еси во мне грамоту свою с Сарыкою; а писал еси в грамоте, чтобы нам к тобе дружба своя держати. И яз к тобе дружбу свою хочю держати; а ты бы нам дружбу свею чинил, а у царя бы еси нашо дело делал. А нынеча есми о котором деле приказал к царю, и ты бы о том царю говорил, на чем мне свое крепкое слово молвил и правду дал и ярлык дал, по тому бы и жаловал, другу бы моему друг был, а недругу бы моему недруг был.

А се говорити Милкоману царевичю. Князь велики велел тобе говорити: брат твой Менли-Гирей царь пожаловал меня братом и другом собе учинил, другу другом быти, а недругу недругом быти. И ты бы нашего дела у царя берегл, а сам бы еси нам дружбу чинил; а яз к тобе хочю дружбу свою держати.

Список с грамоты. Такова грамота послана за Юрьем за Шестаком.— От великого князя Ивана Васильевича Юрью Ивановичю Шестаку. Забыл есми тобе приказати о том: какими делы будет царь переменился: будет нынеча Менли-Гирей на царстве, и ты бы ехал до правые вести. А будет у вас весть полная, что царь переменился, и ты бы ся воротил ко мне, а Тонкача бы еси не отпущал назад до правые вести, ехал бы с тобою доколе нолни отведаешь о царе дополна. А яз о том Тонкачю приказал же, чтобы ехал с тобою до правые вести. А будет царь не переменился, будет и ныне Менли-Гирей на царстве, и ты бы поехал к царю по моему наказу, а Тонкачя бы еси вел с собою доколе будет пригож, да отпустил бы еси его ко мне. Да чтобы еси ехал неспешно, дожидал бы еси Тонкача. А сю мою грамоту ведай [32] собе ты один, да дияк, который тобе прочтет; а иной бы того не ведал никто.

Спасибо команде vostlit.info за огромную работу по переводу и редактированию этих исторических документов! Это колоссальный труд волонтёров, включая ручную редактуру распознанных файлов. Источник: vostlit.info